పాయింట్ బ్లాంక్, వెబ్డెస్క్: ఐదేళ్ల కిందట లోక్సభ ఎన్నికల్లో రెండు చోట్ల పోటీ చేసి కేవలం వాయనాడ్లో మాత్రమే నెగ్గిన కాంగ్రెస్ అగ్రనేత రాహుల్ గాంధీ.. 2024 ఎన్నికల్లో రెండు చోట్ల పోటీ చేసి రెండు చోట్ల ఘనవిజయం సాధించారు. వాయనాడ్తో పాటు రాయ్బరేలీలోనూ రాహుల్ గెలుపును సాధించారు. అయితే ఈ రెండింటిలో ఏ స్థానాన్ని వదులుకోవాలన్నది ఆయనకు పెద్ద సమస్యగా మారింది. 2019లో ఎదురుగాలిలోనూ తనను ఎంతో ఆదరించి అక్కున్న చేర్చకున్న వాయనాడ్ నియోజకవర్గం ఒకవైపు.. పోయిన ప్రాభవాన్ని ఈసారి ఎన్నికల్లో తిరిగి అందించిన రాయ్బరేలీ మరోవైపు.. రాహుల్ను సందిగ్ధంలో పడేశాయి. తీవ్రంగా ఆలోచించిన మీదట ఆయన కేరళలోని వాయనాడ్ స్థానాన్ని వదులుకోవాలని నిర్ణయించారు. వాయనాడ్ నుంచి రాహుల్ సోదరి ప్రియాంక గాంధీ బరిలో దిగడం ఖరారైంది.
అయితే దీనిపై రాహుల్ స్పందిస్తూ.. వాయనాడ్ను వదులుకోవాలా, రాయ్బరేలీని వదులుకోవాలా? అనే అంశంలో తీవ్రంగా మథనపడ్డానని వెల్లడించారు. వాయనాడ్ ఎప్పటికీ తన హృదయానికి దగ్గరగా ఉంటుందని, ఇకమీదట వాయనాడ్కు తరచుగా వస్తుంటానని తెలిపారు. కాగా, రాహుల్ వాయనాడ్ను వదులుకుంటున్న విషయాన్ని కాంగ్రెస్ జాతీయ అధ్యక్షుడు మల్లికార్జున ఖర్గే ప్రకటించారు. ఏఐసీసీ సమావేశంలో చర్చించిన మీదట ఈ నిర్ణయం తీసుకున్నట్టు తెలిపారు.
